ഇറാന്‍-ഇസ്രയേല്‍ സംഘര്‍ഷത്തിന്റെ പശ്ചാത്തലത്തില്‍ ടെഹ്‌റാനിലെ ഇന്ത്യൻ വിദ്യാർത്ഥികളെ ഒഴിപ്പിച്ച് ഇന്ത്യൻ എംബസി. വിദേശകാര്യ മന്ത്രാലയം 24 മണിക്കൂറും പ്രവർത്തിക്കുന്ന കൺട്രോൾ റൂം സജ്ജമാക്കി.

ടെഹ്‌റാനിലെ ഇന്ത്യൻ വിദ്യാർത്ഥികളെ സംഘർഷ സാഹചര്യം കണക്കിലെടുത്ത് ഇന്ത്യൻ എംബസി നഗരത്തിൽ നിന്നും ഒഴിപ്പിച്ചു. മറ്റ് ഇന്ത്യൻ പൗരന്മാര്‍ക്കും സുരക്ഷിത ഇടങ്ങളിലേക്ക് മാറാന്‍ നിർദേശം നല്‍കിയതായി വിദേശകാര്യ മന്ത്രാലയം അറിയിച്ചു. ഇന്ത്യക്കാർക്ക് ഇറാൻ - അർമേനിയ അതിർത്തിയിലൂടെ പുറത്തു കടക്കാനും എംബസി സൗകര്യമൊരുക്കിയിട്ടുണ്ട്.

ഇസ്രായേൽ- ഇറാൻ സംഘർഷത്തിന്റെ പശ്ചാത്തലത്തിൽ വിദേശകാര്യ മന്ത്രാലയം 24 മണിക്കൂറും പ്രവർത്തിക്കുന്ന കൺട്രോൾ റൂമും സജ്ജമാക്കി. അടിയന്തര സഹായങ്ങൾക്ക് 1800 118 797 എന്ന ഹെൽപ്പ്‌ലൈൻ നമ്പറിൽ ബന്ധപ്പെടാവുന്നതാണ്. കൂടാതെ, +91-99682 91988 എന്ന വാട്ട്‌സ്ആപ്പ് നമ്പറും situationroom@mea.gov.in എന്ന ഇമെയിൽ വിലാസവും സജ്ജമാക്കിയിട്ടുണ്ട്. ഇറാനിലുള്ള ഇന്ത്യക്കാർക്ക് ഇന്ത്യൻ എംബസിയുടെ അടിയന്തര ഹെൽപ്പ്‌ലൈൻ നമ്പറുകളായ +98 91281 09115, +98 91281 09109 എന്നിവയിലും ബന്ധപ്പെടാം.