ബൈക്ക് മോഷ്ടിച്ചവർ ഹെൽമറ്റ് ധരിക്കാത്തതിന് ഉടമക്ക്​ പിഴ.

വീട്ടിൽനിന്ന്​ മോഷണംപോയ ബൈക്ക്​ തിരികെ ലഭിച്ചെങ്കിലും മോഷ്​ടാക്കൾ ഹെൽമറ്റ്​ ധരിക്കാത്തതിന്​ ഉടമക്ക്​ പിഴ. തലയോലപ്പറമ്പ്​​ വടയാർ ​ പൊട്ടൻചിറ സ്വദേശി വിഷ്ണുവിന്‍റെ ബൈക്കാണ് മോഷണം പോയത്. വെള്ളിയാഴ്ച രാത്രി​ വീടിന്‍റെ പോർച്ചിൽ നിന്നാണ് ബൈക്ക് മോഷണം പോയത്. ശനിയാഴ്ച രാവിലെ ഉടമ ഉണർന്നപ്പോഴാണ്​ മോഷണവിവരം അറിയുന്നത്​. 

തുടർന്ന്​ തിരച്ചിൽ നടത്തുന്നതിനിടെ പുത്തൻകാവ് പൊലീസ് സ്​റ്റേഷനിൽനിന്ന്​ ​ ഉടമക്ക് വിളിവരുകയും ബൈക്ക് ലഭിച്ചതായി അറിയിക്കുകയും ചെയ്​തു. വാഹനത്തിന്‍റെ രേഖകളുമായി​ എത്താനും നിർദേശിച്ചു. രാത്രി പൊലീസ്​ പട്രോളിങ്​ സംഘത്തെക്കണ്ട്​ മോഷ്ടാക്കൾ ബൈക്ക്​ ഉപേക്ഷിച്ച്​ കടന്നുകളയുകയായിരുന്നു. ആർ.സി രേഖകളിൽനിന്ന്​ ഫോൺ നമ്പർ ശേഖരിച്ചാണ്​ ഉടമയെ വിവരം അറിയിച്ചത്​. ശനിയാഴ്ച ഉടമ  രേഖകളുമായി സ്റ്റേഷനിലെത്തി വാഹനവുമായി മടങ്ങി.

 എന്നാൽ, ഇതിനുപിന്നാലെയാണ്​ ഉടമക്ക് ഹെൽമറ്റ് ധരിക്കാതെ ബൈക്ക് ഓടിച്ചതിനുള്ള പിഴ പൊലീസുകാർ വീട്ടിലെത്തി നൽകിയത്. നോട്ടീസിൽ ഹെൽമറ്റ് ധരിക്കാതെ ബൈക്ക് ഓടിക്കുന്നതിന്‍റെ  ദൃശ്യങ്ങളും വ്യക്തമായി കാണാം. ഉടമ സംഭവം വിവരിച്ചതോടെ പൊലീസുകാർ മടങ്ങി. ഈ ദൃശ്യങ്ങളുടെ അടിസ്ഥാനത്തിൽ മോഷ്ടാക്കളെ കണ്ടെത്താനായി പൊലീസ്​ അന്വേഷണം തുടങ്ങി.