ചോമ്പാല് ടെലിഫോണ് എക്സ്ചേഞ്ചിലെ ലാന്ഡ് ഫോണുകള് കൂട്ടത്തോടെ പ്രവര്ത്തനരഹിതമായി. കുഞ്ഞിപ്പള്ളി, മുക്കാളി, കണ്ണൂക്കര, ചോമ്പാല് ഭാഗത്തെ നിരവധി ഫോണുകളാണ് നിശ്ചലമായത്. ദേശീയപാത വികസനവുമായി ബന്ധപ്പെട്ട് ഈ ഭാഗങ്ങളില് ലെവലിങ് പ്രവൃത്തി നടന്നുവരുകയാണ്.
ഒരു സുരക്ഷ മാനദണ്ഡവുമില്ലാതെ തലങ്ങുംവിലങ്ങുമായി പോയ മണ്ണുമാന്തി യന്ത്രങ്ങള് ടെലിഫോണ് കേബിളുകള് തകര്ത്തതാണ് കാരണമായത്. ആഴത്തില് കുഴിച്ചിട്ട കേബിളുകളാണ് ദേശീയപാത നിര്മാണ കരാറെടുത്ത കമ്പനിയുടെ ജോലിക്കാര് നശിപ്പിച്ചത്. ലക്ഷക്കണക്കിന് രൂപയുടെ നഷ്ടമാണ് ബി.എസ്.എന്.എലിനുണ്ടായത്. തകര്ന്ന കേബിളുകള് മാറ്റിസ്ഥാപിച്ച് കണക്ഷന് പുനഃസ്ഥാപിക്കാന് ആഴ്ചകളെടുക്കുമെന്നാണ് ബി.എസ്.എന്.എല് നല്കുന്ന വിശദീകരണം.
ഇന്റര്നെറ്റ് കണക്ഷനെയും ഇത് ബാധിച്ചിട്ടുണ്ട്. കണക്ഷന് പുനഃസ്ഥാപിക്കുന്നതുമായി ബന്ധപ്പെട്ട് ഒരുവിധ നടപടിയും ബി.എസ്.എന്.എല് തുടങ്ങിയിട്ടില്ല. മറ്റു പ്രദേശങ്ങളിലും ദേശീയപാത ലെവലിങ് പ്രവൃത്തി തുടങ്ങിയാല് ഈ മേഖലയിലും ലാന്ഡ് ഫോണുകള് നിശ്ചലമാകുന്ന സ്ഥിതിയാണ്. ബി.എസ്.എന്.എല് ദേശീയപാത കരാര് കമ്പനിയും ഒരുമിച്ചു പ്രവര്ത്തിച്ചാലേ മറ്റുമേഖലകളില് ലാന്ഡ്ഫോണുകളെ രക്ഷിക്കാന് കഴിയൂ എന്നാണ് അധികൃതര് പറയുന്നത്. ചോമ്പാല് ടെലിഫോണ് എക്സ്ചേഞ്ചിലെ ലാന്ഡ്ഫോണ് തകരാര് പരിഹാരിക്കണമെന്ന് താലൂക്ക് വികസന സമിതി അംഗം പ്രദീപ് ചോമ്പാല ആവശ്യപ്പെട്ടു.
Post a Comment