ദീര്ഘദൂര ബസുകളുടെ മത്സരയോട്ടം റോഡുകളിൽ പതിവായതിനു പിന്നാലെ അമിത വേഗത ചോദ്യംചെയ്ത ബൈക്ക് യാത്രികനെ സ്വകാര്യ ബസ് ഇടിച്ചുതെറിപ്പിച്ച് നിര്ത്താതെപോയതായി പരാതി. ഇരുകാലുകള്ക്കും ഗുരുതര പരിക്കേറ്റ് റോഡില് കിടന്ന യാത്രികനെ പൊലീസ് എത്തി ആശുപത്രിയിൽ പ്രവേശിപ്പിച്ചു .
കഴിഞ്ഞ ദിവസം മാവൂര് റോഡിലാണ് സംഭവം നടന്നത്. ബൈക്കില് പോവുകയായിരുന്ന നടക്കാവ് സ്വദേശി കണ്ണങ്കടവത്ത് അഷ്റഫിനെയാണ് ബസിടിച്ച് തെറിപ്പിച്ചത്. ഒപ്പമുണ്ടായിരുന്ന മകന് ആദിലിനും പരിക്കുണ്ട്. കോഴിക്കോട് -കണ്ണൂര് റൂട്ടില് സര്വിസ് നടത്തുന്ന കെ.എല് -58 ജി 3069 നമ്ബര് 'ഫെറാരി' ബസാണ് ഇടിച്ചുതെറിപ്പിച്ചതെന്ന് അഷ്റഫ് പറഞ്ഞു. അമിത വേഗതയില് വന്ന ബസിലെ ഡ്രൈവറോട് മെല്ലെ പോയാല് പോരേയെന്ന് മാവൂര് റോഡിലെ ബസ് സ്റ്റോപ്പിനടുത്തുനിന്ന് അഷ്റഫ് പറഞ്ഞിരുന്നു. ഇതോടെ ബസിലെ ക്ലീനര് അഷ്റഫിനെ ഭീഷണിപ്പെടുത്തി.
തുടര്ന്ന് കെ.എസ്.ആര്.ടി.സി ബസ് ടെര്മിനലിനു സമീപത്തുനിന്ന് മനഃപൂര്വം ബൈക്കിനുപിന്നില് ഇടിക്കുകയും നിര്ത്താതെ പോവുകയുമായിരുന്നു. അഷ്റഫിന്റെ കാലിന് പൊട്ടലുണ്ട്. മകന് ആദിലിന്റെ കാല്വിരലുകള്ക്കാണ് പരിക്കേറ്റത്. ഇരുവരും മെഡിക്കല് കോളജ് ആശുപത്രിയില് ചികിത്സയിലാണ്. ബസിനെതിരെ നടപടിയാവശ്യപ്പെട്ട് നടക്കാവ് പൊലീസില് പരാതി നല്കി.
Post a Comment