ജില്ലാ കളക്ടർമാർക്ക് സ്ഥാനചലനം. തൃശൂർ, പത്തനംതിട്ട, കോഴിക്കോട്, എറണാകുളം, കോട്ടയം, ഇടുക്കി കളക്ടർമാർക്കാണ് മാറ്റം.
പത്തനംതിട്ട കളക്ടറായിരുന്ന ഡോ. നരസിംഹുഗാരി തേജ് ലോഹിത് റെഡ്ഡിയെ കോഴിക്കോട്ടേക്ക് മാറ്റി.
തൃശൂർ കളക്ടറായ ഷാനവാസിനു പകരമായി ഹരിത വി. കുമാറിനെ നിയമിച്ചു. ജാഫർ മാലിക്ക് ആണ് പുതിയ എറണാകുളം കളക്ടർ. എസ്.സുഹാസിനെ റോഡ്സ് ആന്ഡ് ബ്രിഡ്ജസ് കോര്പറേഷന് എംഡിയായി നിയമിക്കും.
കോട്ടയം കളക്ടർ അഞ്ജന എമ്മിനും മാറ്റമുണ്ട്. ജില്ലാ പഞ്ചായത്ത് ഡിപ്പാർട്ട്മെന്റിലായിരുന്ന പി.കെ ജയശ്രീ ആണ് പുതിയ കോട്ടയം കളക്ടർ. സോഷ്യൽ ജസ്റ്റീസ് ഡയറക്ടറായിരുന്ന ഷീബ ജോർജിനെ ഇടുക്കി കളക്ടറായി നിയമിച്ചു. ഡോ. വേണുവിനെ ഉന്നത വിദ്യാഭ്യാസ സെക്രട്ടറിയായും ആശാ തോമസിനെ ആരോഗ്യവകുപ്പ് സെക്രട്ടറിയായും തീരുമാനിച്ചു.
സംസ്ഥാനത്തിന്റെ മുഖ്യ തിരഞ്ഞെടുപ്പ് ഓഫിസർ സ്ഥാനത്തുനിന്നു ടിക്കാറാം മീണയെ നീക്കി. പ്ലാനിങ് ആൻഡ് ഇക്കണോമിക് അഫയേഴ്സ് അഡിഷനൽ സെക്രട്ടറിയായാണു മാറ്റം. കേന്ദ്ര തിരഞ്ഞെടുപ്പു കമ്മിഷൻ നിർദേശം കൂടി പരിഗണിച്ചാണു മാറ്റം. സഞ്ജയ് എം. കൗളിനാണു മുഖ്യ തിരഞ്ഞെടുപ്പ് ഓഫിസറുടെ പുതിയ ചുമതല. ഇതു കൂടാതെ ഐഎഎസ് തലപ്പത്തും നിരവധി അഴിച്ചുപണികളുണ്ട്.
2013 ഐഎഎസ് ബാച്ചിലെ നരസിംഹുഗാരി റെഡ്ഢിയാണ് കോഴിക്കോടിന്റെ പുതിയ കളക്ടർ.കോട്ടയം അസിസ്റ്റന്റ് കളക്ടറായി ട്രെയിനിങ് പൂർത്തിയാക്കിയ ഇദ്ദേഹം ഇടുക്കി സബ് കളക്ടർ ആയും, തിരുവനന്തപുരം കോർപ്പറേഷൻ സെക്രട്ടറിയായും, സിവിൽ സപ്ലൈസ് ഡയറക്ടറായും സേവനമനുഷ്ഠിച്ചിട്ടുണ്ട്. 2021 മുതൽ പത്തനംതിട്ട കളക്ടർ ആണ്.
ആന്ധ്രപ്രദേശിലെ കടപ്പ സ്വദേശിയാണ്.
Post a Comment