മീനങ്ങാടി സ്കൂളിലെ വിനോദ യാത്ര വിവാദത്തിൽ പ്രിൻസിപ്പലിന് അനുകൂലമായ തെളിവുകൾ ഇന്ന് പുറത്ത് വന്നിരുന്നു. വിനോദയാത്രയ്ക്ക് രണ്ടര മാസം മുൻപ് തന്നെ ആർഡിഡിയോട് അനുമതി തേടിയിരുന്നു. സ്കൂളിൽ നിന്നുള്ള പഠനയാത്രയ്ക്ക് ഹയർ സെക്കണ്ടറി റീജിയനൽ ഡെപ്യൂട്ടി ഡയറക്ടറിൽ നിന്ന് അനുമതി തേടിയില്ല, രാത്രി യാത്ര നടത്തി, മൂന്ന് ദിവസം വരെ മാത്രമേ പഠനയാത്ര നടത്താവു എന്നിരിക്കെ അഞ്ച് ദിവസത്തെ യാത്ര നടത്തി എന്നീ ചട്ടലംഘനങ്ങൾ ചൂണ്ടിക്കാണിച്ചാണ് പ്രിന്‍സിപ്പൽ ഷിവി കൃഷ്ണനെ മീനങ്ങാടി സ്കൂളിൽ നിന്ന് സ്ഥലം മാറ്റിയത്. എന്നാൽ വിനോദ യാത്രയ്ക്ക് രണ്ടര മാസം മുൻപ് തന്നെ ആര്‍ഡിഡിയുടെ അനുമതിയ്ക്കായി സ്കൂളിൽ നിന്ന് അപേക്ഷ നൽകിയിരുന്നു.
ഓഗസ്റ്റ് 14 നാണ് അപേക്ഷ നൽകിയത്. എന്നാൽ ആര്‍ഡിഡി ഓഫീസിൽ നിന്ന് മറുപടി ലഭിച്ചില്ല. സാധാരണ മറുപടി ലഭിക്കാറില്ലെന്നും ടൂർ കഴിഞ്ഞ് വന്ന ശേഷമൊക്കെയാണ് മറുപടി ലഭിക്കാറ് ഉള്ളതെന്നും സ്കൂൾ അധികൃതർ പറയുന്നു. മറ്റ് സ്കൂളുകളിൽ നിന്നൊക്കെ ഹൈദരബാദിലേക്ക് സമാന രീതിയിൽ ടൂർ പോയിട്ടുണ്ട് എന്നിരിക്കെ പ്രിൻസിപ്പൽ ഷിവി കൃഷ്ണനെതിരെ നടപടി എടുത്തത് രാഷ്ട്രീയ പ്രേരിതമെന്നായിരുന്നു ഉയർന്ന ആരോപണം. പ്രിന്‍സിപ്പൽ മദ്യപിച്ചിരുന്നില്ല എന്ന് വ്യക്തമായതിനാൽ മറ്റ് കാരണങ്ങൾ പറഞ്ഞ് വിവാദത്തിന്റെ പശ്ചാത്തലത്തിൽ സ്ഥലം മാറ്റി എന്നാണ് സ്കൂൾ മാനേജ്‌മെന്റ് കമ്മിറ്റി ഉൾപ്പടെ ആരോപിക്കുന്നത്.
Post a Comment