വ്യാജ സിനിമാ പതിപ്പുകളും ഒടിടി ഉള്ളടക്കങ്ങളും പ്ലാറ്റ്ഫോമിലൂടെ വ്യാപകമായി പ്രചരിക്കുന്നതിനെതിരെ ആപ്പായ ടെലിഗ്രാമിന് കടുത്ത അന്ത്യശാസനവുമായി കേന്ദ്ര സർക്കാർ. പകർപ്പവകാശമുള്ള സിനിമകളും മറ്റ് ഓഡിയോ-വിഷ്വൽ ഉള്ളടക്കങ്ങളും അനധികൃതമായി പ്രചരിപ്പിക്കുന്നത് അടിയന്തരമായി തടയണമെന്ന് കേന്ദ്ര വാർത്താവിതരണ - പ്രക്ഷേപണ മന്ത്രാലയം കർശന നിർദേശം നൽകി. ഇതുസംബന്ധിച്ച് ടെലിഗ്രാമിന് ഔദ്യോഗിക നോട്ടീസ് അയച്ചിട്ടുണ്ട്. പൈറസിക്കെതിരെ സ്വീകരിച്ച നടപടികളുടെ വിശദമായ റിപ്പോർട്ട് 15 ദിവസത്തിനകം സമർപ്പിക്കാനാണ് കേന്ദ്രത്തിന്റെ ഉത്തരവ്. ഇന്ത്യൻ സിനിമാ വ്യവസായത്തെയും ഒടിടി പ്ലാറ്റ്ഫോമുകളെയും സംരക്ഷിക്കുന്നതിനും ചലച്ചിത്ര നിർമാതാക്കളുടെയും വിതരണക്കാരുടെയും നിലനിൽപ്പ് ഉറപ്പാക്കുന്നതിനുമാണ് കേന്ദ്രത്തിന്റെ ഈ ശക്തമായ ഇടപെടൽ.
തുടർച്ചയായി നിയമലംഘനം നടത്തുന്ന ചാനലുകൾ, ഗ്രൂപ്പുകൾ, അക്കൗണ്ടുകൾ, അവയുടെ അഡ്മിൻമാർ എന്നിവർക്കെതിരെ കർശന നടപടിയെടുക്കാൻ കേന്ദ്രം ആവശ്യപ്പെട്ടിട്ടുണ്ട്. ഐടി ആക്ട് 2000, ഐടി റൂൾസ് 2021 എന്നിവ പ്രകാരമുള്ള കൃത്യമായ ജാഗ്രത പുലർത്താൻ കേവലം ചില ചാനലുകൾ മാത്രം ബ്ലോക്ക് ചെയ്യുന്ന രീതി ഇനി മതിയാകില്ലെന്ന് അധികൃതർ ടെലിഗ്രാമിന് മുന്നറിയിപ്പ് നൽകി. പ്ലാറ്റ്ഫോം ദുരുപയോഗം ചെയ്യുന്നത് തടയാൻ സ്വയം പ്രവർത്തിക്കുന്ന ശക്തമായ ഒരു ഇൻ-ബിൽറ്റ് സംവിധാനം ടെലിഗ്രാം ഒരുക്കേണ്ടി വരും. ഡിജിറ്റൽ സുരക്ഷ മുൻനിർത്തി പ്രമുഖ സോഷ്യൽ മീഡിയ കമ്പനിയായ മെറ്റയ്ക്കെതിരെ കേന്ദ്ര സർക്കാർ ശക്തമായ നിയമനടപടികൾ സ്വീകരിച്ചതിന് തൊട്ടുപിന്നാലെയാണ് ടെലിഗ്രാമിനെതിരെയുള്ള ഈ പുതിയ നീക്കം. കഴിഞ്ഞ മാസം നീറ്റ് യുജി പുനഃപരീക്ഷയ്ക്ക് മുന്നോടിയായും ടെലിഗ്രാമിന് ഇന്ത്യയിൽ താൽക്കാലിക നിരോധനം ഏർപ്പെടുത്തിയിരുന്നു.
മറ്റ് ആപ്പുകളിൽ നിന്നും വ്യത്യസ്തമായി, ടെലിഗ്രാമിൽ 2 ജിബി മുതൽ 4 ജിബി വരെയുള്ള ഉയർന്ന നിലവാരമുള്ള വിഡിയോ ഫയലുകൾ യാതൊരു നിയന്ത്രണവുമില്ലാതെ അപ്ലോഡ് ചെയ്യാൻ സാധിക്കും. സിനിമകൾ ടെലിഗ്രാമിന്റെ ക്ലൗഡ് സെർവറുകളിൽ നേരിട്ട് സംഭരിക്കപ്പെടുന്നതിനാൽ, ഉപയോക്താക്കളുടെ ഫോൺ മെമ്മറി നഷ്ടപ്പെടുത്താതെ ലക്ഷക്കണക്കിന് ആളുകളിലേക്ക് ഇവ ഒരേസമയം എത്തിക്കാൻ പൈറസി സംഘങ്ങൾക്ക് എളുപ്പത്തിൽ സാധിക്കുന്നുണ്ട്.
ഇതോടൊപ്പം പ്രധാന ചാനലുകൾ ബ്ലോക്ക് ചെയ്യപ്പെടാനുള്ള സാധ്യത മുൻകൂട്ടി കണ്ട് ബാക്കപ്പ് ചാനലുകളുടെ ഒരു വലിയ ശൃംഖല തന്നെ ഇവർ നിർമ്മിക്കാറുണ്ട്. പൊതുവായി കാണുന്ന ലിങ്കുകൾക്ക് പകരം ഉപയോക്താക്കളെ രഹസ്യ ഗ്രൂപ്പുകളിലേക്ക് എത്തിക്കുന്ന പ്രൈവറ്റ് ഇൻവിറ്റേഷൻ ലിങ്കുകൾ വഴിയാണ് പലപ്പോഴും സിനിമകൾ വിതരണം ചെയ്യുന്നത്. ഉപയോക്താക്കൾ ഒരു സിനിമയുടെ പേര് ടൈപ്പ് ചെയ്യുമ്പോൾ തന്നെ ലഭ്യമായ എല്ലാ പ്രിന്റുകളുടെയും ഡൗൺലോഡ് ലിങ്കുകൾ നിമിഷങ്ങൾക്കകം നൽകുന്ന ഓട്ടോമേറ്റഡ് ബോട്ടുകളാണ് പൈറസി ശൃംഖലയുടെ പ്രധാന പ്രവർത്തനങ്ങൾക്ക് ഉപയോഗിക്കുന്നത്.
Post a Comment