ഗൂഗിൾ മാപ്പിനോട് ഇനി സംസാരിക്കാം, ഡ്രൈവിങ് തടസപ്പെടില്ല; ഇന്ത്യക്കായി പുത്തൻ ഫീച്ചറുകളുമായി ഗൂഗിൾ.

ഇന്ത്യയിൽ പുതിയ പത്ത് ഫീച്ചറുകൾ അവതരിപ്പിച്ച് ഗൂഗിൾ. ഇന്ത്യയിൽ ഡ്രൈവിംഗ് കൂടുതൽ മികച്ചതും സുരക്ഷിതവുമാക്കുന്നതിന് വേണ്ടിയുള്ള ഫീച്ചറുകളും ഇക്കൂട്ടത്തിലുണ്ട്. ജെമിനൈ എഐ പിന്തുണയുള്ള എഐ ഫീച്ചറുകൾ ഉൾപ്പടെയാണ് അവതരിപ്പിച്ചിരിക്കുന്നത്. വാഹനമോടിക്കുന്നതിനിടെ ശ്രദ്ധതെറ്റാതെ ഗൂഗിൾ മാപ്പുമായി സംസാരിക്കാനും യാത്രചെയ്യുന്ന വഴിയിലെ മറ്റ് വിവരങ്ങൾ ചോദിച്ചറിയാനും ഈ ഫീച്ചർ സഹായിക്കും. ഉദാഹരണത്തിന് അടുത്തുള്ള പെട്രോൾ പമ്പ് എവിടെയാണ്, പാർക്കിങ് സൗകര്യം എവിടെയുണ്ട് പോലുള്ള വിവരങ്ങൾ ശബ്ദത്തിൽ ചോദിച്ചറിയാൻ ഡ്രൈവർക്ക് സാധിക്കും. ഇന്ത്യയിലെ ഗൂഗിൾ മാപ്പിലെ ഏറ്റവും വലിയ എഐ സംയോജനമായിരിക്കുമിതെന്ന് ഗൂഗിൾ പറയുന്നു.

കൈകൾ ഉപയോഗിക്കാതെ ശബ്ദ നിർദേശങ്ങളാൽ ഗൂഗിളിന്റെ കഴിവുകൾ ഉപയോഗപ്പെടുത്താൻ ഈ ഫീച്ചർ ഉപയോഗിച്ച് സാധിക്കും. വാഹനം ഓടിക്കുന്നതിനിടെ ഗൂഗിൾ മാപ്പിനോട് സംസാരിച്ചാൽ മാത്രം മതി. ഏറ്റവും അടുത്തുള്ള പെട്രോൾ പമ്പ് കണ്ടെത്തുക', 'ഫീനിക്സ് മാളിലെ പാർക്കിംഗ് എങ്ങനെയുണ്ട്?' എന്ന് ചോദിക്കുക,' അടുത്തുള്ള ഒരു റെസ്റ്റോറന്റ് കണ്ടെത്തി അവിടേക്ക് നാവിഗേറ്റ് ചെയ്യുക'തുടങ്ങിയ ആവശ്യങ്ങൾ ഈ വോയ്സ് അസിസ്റ്റന്റിനോട് പറയാം. ജെമിനൈ എഐയുടെ പിന്തുണയിൽ പ്രവർത്തിക്കുന്നതിനാൽ സ്വാഭാവിക മായ സംസാരശൈലി ഗൂഗിൾ മാപ്പിന് മനസിലാവും. ജിമെയിൽ (Gmail) അല്ലെങ്കിൽ കലണ്ടർ ആക്‌സസ് ചെയ്യാൻ ഉപയോക്താക്കൾ അനുമതി ബന്ധപ്പെട്ട കലണ്ടർ ഇവന്റ്, റിമൈന്റർ എന്നിവ സെറ്റ് ചെയ്യാനും ഈ വോയ്സ് അസിസ്റ്റന്റ് ഉപയോഗിക്കാം. ആൻഡ്രോയിഡിലും ഐഒഎസിലും ഈ ഫീച്ചർ എത്തും.

സുരക്ഷാ മുന്നറിയിപ്പുകളും വേഗപരിധി നിർദ്ദേശങ്ങളും

കോൺവർസേഷൻ നാവിഗേഷനോടൊപ്പം തന്നെ, ഗവൺമെന്റ് വകുപ്പുകളുമായും നഗര ട്രാഫിക് അധികാരികളുമായും സഹകരിച്ച് വികസിപ്പിച്ച നിരവധി റോഡ് സുരക്ഷാ ഫീച്ചറുകളും ഗൂഗിൾ അവതരിപ്പിച്ചിട്ടുണ്ട്.

1. പ്രോആക്ടീവ് ട്രാഫിക് അലേർട്ടുകൾ: മാപ്പ് നാവിഗേഷൻ ഉപയോഗിക്കാത്തപ്പോഴും റോഡിലെ കാലതാമസം, തടസങ്ങൾ എന്നിവ സംബന്ധിച്ച അറിയിപ്പ് നൽകും. ഡൽഹി, മുംബൈ, ബെംഗളൂരു എന്നിവിടങ്ങളിലെ പ്രധാന റൂട്ടുകളിലാണ് ഇത് ആദ്യം തുടങ്ങുക.

2. അപകട മേഖലകളെക്കുറിച്ചുള്ള മുന്നറിയിപ്പുകൾ: ഉയർന്ന അപകട സാധ്യതയുള്ള പ്രദേശങ്ങളിലേക്ക് അടുക്കുമ്പോൾ വിഷ്വൽ, വോയിസ് മുന്നറിയിപ്പുകൾ നൽകി സുരക്ഷിതമായ ഡ്രൈവിംഗിന് പ്രോത്സാഹനം നൽകും. ഗുരുഗ്രാം, ഹൈദരാബാദിലെ സൈബരാബാദ് മേഖല, ചണ്ഡീഗഡ്, ഫരീദാബാദ് എന്നിവിടങ്ങളിലാണ് ഈ സൗകര്യം ആദ്യം തുടങ്ങുക.

3. ഔദ്യോഗിക വേഗപരിധി: ട്രാഫിക്  വകുപ്പുകളിൽ നിന്ന് ലഭിച്ച ഔദ്യോഗിക വേഗപരിധികൾ ആപ്പ് സ്‌പീഡോമീറ്ററിന് അടുത്തായി പ്രദർശിപ്പിക്കാൻ തുടങ്ങും. മുംബൈ, കൊൽക്കത്ത, ജയ്പൂർ, ലഖ്നൗ, നോയിഡ ഉൾപ്പെടെ ഒമ്പത് നഗരങ്ങളിൽ ഇത് ആദ്യം നിലവിൽ വരും.

ദേശീയ പാതകളിലെ റോഡ് അടച്ചുപൂട്ടലുകൾ, അറ്റകുറ്റപ്പണികൾ, വിശ്രമ കേന്ദ്രങ്ങൾ, ഭക്ഷണശാലകൾ തുടങ്ങിയവയെകുറിച്ച് തത്സമയ വിവരങ്ങൾ നൽകുന്നതിനായി നാഷണൽ ഹൈവേ അതോറിറ്റി ഓഫ് ഇന്ത്യയുമായി (NHAI) ഗൂഗിൾ പങ്കാളിത്തത്തിൽ ഏർപ്പെട്ടിട്ടുണ്ട്.

ഇന്ത്യൻ യാത്രക്കാർക്കുള്ള മറ്റ് അപ്ഡേറ്റുകൾ

ഇന്ത്യയിൽ വലിയ തോതിൽ ഇരുചക്രവാഹന ഉപഭോക്താക്കളുണ്ടെന്ന് തിരിച്ചറിഞ്ഞ്, വിവിധ ശൈലികളിലും നിറത്തിലുമുള്ള വ്യക്തിഗത ബൈക്ക് ഐക്കണുകളായ (Navatars) ഗൂഗിൾ മാപ്പിൽ ചേർത്തിട്ടുണ്ട്. ഇതിൽ ഇഷ്ടമുള്ളത് ഉപഭോക്താക്കൾക്ക് തിരഞ്ഞെടുക്കാം. സങ്കീർണ്ണമായ കവലകളും എലവേറ്റഡ് റോഡുകളും എളുപ്പത്തിൽ നാവിഗേറ്റ് ചെയ്യാൻ സഹായിക്കുന്നതിനായി ഒമ്പത് ഇന്ത്യൻ ഭാഷകളിൽ ഫ്ലൈഓവറുകൾക്കായുള്ള പുതിയ വോയിസ് നിർദ്ദേശങ്ങളും വരുന്നുണ്ട്.

കൂടാതെ, ഡൽഹി, ബെംഗളൂരു, കൊച്ചി, ചെന്നൈ തുടങ്ങിയ നഗരങ്ങളിൽ നിലവിലുള്ള മെട്രോ ബുക്കിംഗ് പിന്തുണയ്ക്ക് പുറമെ, മെട്രോ യാത്രക്കാർക്കായി ഗൂഗിൾ വാലറ്റ് പിന്തുണയും ഉൾപ്പെടുത്തിയിട്ടുണ്ട്. ഇത് സ്റ്റേഷനുകളിൽ വേഗത്തിൽ പ്രവേശിക്കുന്നതിനായി മെട്രോ ടിക്കറ്റുകൾ മാപ്സിൽ നേരിട്ട് സേവ് ചെയ്യാൻ സഹായിക്കും, മുംബൈയിൽ ഉടൻ ഈ സൗകര്യം ലഭ്യമാവും.