സ്വകാര്യ ബസ് ഇടിച്ച് ബൈക്ക് യാത്രികന് ദാരുണാന്ത്യം.

കോഴിക്കോട്: പൂവാട്ടുപറമ്പിൽ സ്വകാര്യബസ് ഇടിച്ച് ബൈക്ക് യാത്രക്കാരന് ദാരുണാന്ത്യം. കായലം സ്വദേശി സലീം ആണ് മരിച്ചത്. തിങ്കളാഴ്ച‌ വൈകീട്ട് അഞ്ചുമണിയോടെ പെരുവയൽ പഞ്ചായത്ത് ഓഫീസിന് അടുത്തുവെച്ചായിരുന്നു അപകടം. മാവൂരിൽനിന്ന് കോഴിക്കോട്ടേക്ക് പോകുകയായിരുന്ന സ്വകാര്യബസ് ആണ് അപകടം ഉണ്ടാക്കിയത്.

അമിതവേഗത്തിലെത്തിയ ബസ്, മുന്നിലെ ബസിനെ മറികടക്കാൻ ശ്രമിക്കുകയായിരുന്നു. ഇതിനിടെ എതിർദിശയിൽനിന്ന് മറ്റൊരു വാഹനം വന്നു. അതിൽ ഇടിക്കാതിരിക്കാൻ ബസ് റോഡ് അരികിലേക്ക് ചേർത്തപ്പോഴാണ് സലീമിന്റെ ബൈക്കിൽ ഇടിച്ചത്. ഇതോടെ സലീം, ബസിന് അടിയിൽപ്പെട്ടു. ബസിൻ്റെ പിൻചക്രം തലയിലൂടെ കയറുകയും സലീം തൽക്ഷണം മരിക്കുകയുമായിരുന്നു.