മലപ്പുറം താനൂരിൽ ഓടിക്കൊണ്ടിരിക്കുന്ന ബസിന് മുന്നിൽ ബൈക്ക് നിർത്തി പരാക്രമം കാണിച്ച യുവാവിനെ പിടികൂടി പോലീസ്. താനൂർ ബീച്ച് റോഡിലെ ഉള്ളാൽ ഭാഗത്തുവെച്ച് യുവാവ് നടത്തിയ അഭ്യാസത്തിൻ്റെ വീഡിയോ കഴിഞ്ഞ ദിവസം പുറത്തുവന്നിരുന്നു. ഈ ദൃശ്യങ്ങൾ സഹിതം പങ്കുവെച്ചുകൊണ്ടാണ് യുവാവിനെ പിടികൂടിയ വീഡിയോ കേരള പോലീസിന്റെ ഔദ്യോഗിക ഫെയ്‌സ് ബുക്ക് പേജിലൂടെ പുറത്തുവിട്ടത്.
ബസിന് മുന്നിൽ യുവാവ് നടത്തിയ പരാക്രമമാണ് പോലീസ് പങ്കുവെച്ച വീഡിയോയുടെ ആദ്യഭാഗത്തുള്ളത്. ഡെപ്യൂട്ടി പോലീസ് സൂപ്രണ്ടിൻ്റെ ഓഫീസിനുള്ളിൽ നിൽക്കുന്ന യുവാവിനെയാണ് പിന്നീട് കാണിക്കുന്നത്. വിവിധ സിനിമ സംഭാഷണങ്ങളുടെയും പാട്ടുകളുടെയും പശ്ചാത്തലത്തോടെയാണ് ദൃശ്യങ്ങൾ ഷെയർ ചെയ്തിരിക്കുന്നത്. 'ഈ ഹീറോ ഇപ്പോൾ എന്ത് ചെയ്യുന്നു' എന്ന കുറിപ്പും ഇതോടൊപ്പമുണ്ട്. അതേസമയം, യുവാവിനെതിരേ ചുമത്തിയ കുറ്റങ്ങൾ സംബന്ധിച്ച് കൂടുതൽ വിവരങ്ങൾ ലഭ്യമല്ല.
കഴിഞ്ഞ വെള്ളിയാഴ്‌ചയായിരുന്നു യുവാവിനെ പിടികൂടാൻ ആസ്‌പദമായ സംഭവം. ബസിന് മുന്നിൽ കയറി ബൈക്ക് പെട്ടെന്ന് ബ്രേക്കിട്ട് നിർത്തുകയായിരുന്നു. ബസ് ഡ്രൈവർ സമയോജിതമായി ബ്രേക്കിട്ടതിനാൽ അപകടം ഒഴിവായി. എന്നാൽ, ബസിലെ യാത്രക്കാർ വീഴാൻപോകുന്നതും കുഞ്ഞുങ്ങളടക്കം കയരുന്നതും ബസിനകത്തെ സിസിടിവിയിൽ പതിഞ്ഞിരുന്നു.
ബസിനു മുന്നിൽ ബൈക്ക് യാത്രികൻ നടത്തിയ അഭ്യാസത്തിൻ്റെ ദൃശ്യങ്ങളും ഇതിലുണ്ടായിരുന്നു. ഈ സംഭവം നടക്കുന്നതിന് മുൻപ് തൊട്ട് പിന്നിലെ സ്റ്റോപ്പിൽവെച്ച് ബസ് ഡ്രൈവറും ബൈക്ക് യാത്രികനായ യുവാവും തമ്മിൽ വാക്കേറ്റമുണ്ടായിരുന്നു.
Post a Comment