വയനാട്ടിൽ 55 പട്ടികവർഗ്ഗ കുടുംബങ്ങൾ സുരക്ഷിത ഭവനങ്ങളിലേക്ക്.

വയനാട്ടിലെ മീനങ്ങാടി ഗ്രാമപഞ്ചായത്തിലെ സി.സിയിലും ആവയലിലുമായി 55 മാതൃക പുനരധിവാസ ഭവനങ്ങൾ ഗുണഭോക്താക്കളിലേക്ക്. മീനങ്ങാടി പഞ്ചായത്തിലെ ഭൂരഹിതരായ 44 പട്ടികവര്‍ഗ്ഗ കുടുംബങ്ങളും, പൂതാടി പഞ്ചായത്തിലെ ഭൂരഹിതരായ 11 പട്ടികവര്‍ഗ്ഗ കുടുംബങ്ങളുമാണ് പദ്ധതിയുടെ ഗുണഭോക്താക്കള്‍. സുല്‍ത്താന്‍ ബത്തേരി താലൂക്കിലെ കൃഷ്ണഗിരി വില്ലേജില്‍ സര്‍ക്കാര്‍ കണ്ടെത്തിയ 7.81 ഏക്കര്‍ ഭൂമിയിലാണ് സ്വപ്ന ഭവനങ്ങള്‍ ഒരുങ്ങിയത്.

വൈദ്യുതി, കുടിവെള്ളം ഉള്‍പ്പെടെയുളള അടിസ്ഥാന സൗകര്യങ്ങളെല്ലാം ഇവിടെ പൂര്‍ത്തിയാക്കിയാക്കിയിട്ടുണ്ട്. സി.സിയില്‍ 48 വീടുകളും ആവയലില്‍ 7 വീടുകളുമാണ് പട്ടിക വര്‍ഗ്ഗ വകുപ്പ് നിര്‍മ്മിച്ചിട്ടുളളത്. ഒരു വീടിന് 6 ലക്ഷം രൂപ നിരക്കില്‍ 3.30 കോടി രൂപയാണ് വീടുകള്‍ക്കായി ചെലവിട്ടത്. ജില്ലാ നിര്‍മ്മിതി കേന്ദ്രമാണ് നിര്‍മ്മാണം ഏറ്റെടുത്തത്. കുടിവെള്ളം, വൈദ്യൂതി ലഭ്യമാക്കുന്നതിനായി കേരളാ വാട്ടര്‍ അതോറിറ്റിയ്ക്ക് 36 ലക്ഷം രൂപയും കെ.എസ്.സി.ബിയ്ക്ക് 10,35,748 രൂപയും പട്ടിക വര്‍ഗ്ഗ വകുപ്പ് പ്രത്യേകം അനുവദിച്ചിരുന്നു. ഞായറാഴ്ച (16) മന്ത്രി കെ. രാധാകൃഷ്ണനാണ് ഭവനങ്ങൾ ഗുണഭോക്താക്കൾക്ക് കൈമാറിയത്.