പൊലീസ് ആറാടുകയാണ് ; സംസ്ഥാനത്ത് കെ ഗുണ്ടായിസമെന്ന് വിഷ്ണുനാഥ് എം എൽ എ

സംസ്ഥാനത്ത്​ നടക്കുന്നത്​ കെ ഗുണ്ടായിസമാണെന്നും പൊലീസ്​ ​ആറാടുകയാണെന്നും പി.സി വിഷ്ണുനാഥ്​ എം.എല്‍.എ.

സില്‍വര്‍ലൈനിനെതിരെ നിയമസഭയില്‍ അടിയന്തിര പ്രമേയം അവതരിപ്പിച്ച്‌​ സംസാരിക്കുകയായിരുന്നു അദ്ദേഹം. ഈ വിഷയത്തില്‍ ഒരു ചര്‍ച്ചയുമില്ലെന്ന്​ ആദ്യം പറഞ്ഞ മുഖ്യമന്ത്രി ഇപ്പോള്‍ നിയമസഭയില്‍ ചര്‍ച്ചയാവാമെന്ന്​ പറഞ്ഞത്​ സമരം ചെയ്യുന്ന പാവപ്പെട്ടവരുടെയും സ്ത്രീകളുടെയും കുട്ടികളുടെയും വിജയമാണെന്നും അദ്ദേഹം പറഞ്ഞു.

പദ്ധതിയുടെ പേരില്‍ പൊലീസ്​ സ്ത്രീകളെയും കുട്ടികളെയും ആക്രമിക്കുകയാണ്​. അടുക്കളയില്‍ വരെ മഞ്ഞക്കല്ലുകള്‍ കുഴിച്ചിടുകയാണ്. കേരളം കണ്ടിട്ടില്ലാത്ത ഫാസിസമാണ് അരങ്ങേറുന്നത്​. ഭരണപരാജയം മറച്ചുവയ്ക്കാനുള്ള പദ്ധതിയാണിത്. കുഞ്ഞുങ്ങളുടെ ഏറ്റവും വലിയ ഹീറോകള്‍ അവരുടെ മാതാപിതാക്കളാണ്​. ആ കുഞ്ഞുങ്ങളുടെ മുന്നില്‍ വെച്ച്‌​ മാതാപിതാക്കളെ മര്‍ദിക്കുന്ന പൊലീസ്​ സൃഷ്ടിക്കുന്ന സാമൂഹികാഘാതം നികത്താനാകാത്തതാണെന്നും അദ്ദേഹം പറഞ്ഞു.

ജനങ്ങള്‍ക്ക്​ വേണ്ടിയാണ്​ അര്‍ധ അതിവേഗ പാതയെന്ന്​ സര്‍ക്കാര്‍ പറയുന്നു. എന്നാല്‍, ആരാണ്​ ഇത്​ ആവശ്യപ്പെട്ടിട്ടുള്ളതെന്നും ജനങ്ങള്‍ മുഴുവന്‍ പദ്ധതിക്ക്​ എതിരാണെന്നും അദ്ദേഹം പറഞ്ഞു. നെല്‍വയല്‍ നികത്തേണ്ടി വരുമെന്ന് ഡി.പി.ആറില്‍ തന്നെ പറയുന്നു. പ്രതിഷേധിക്കുന്നവര്‍ക്കെതിരേ സര്‍ക്കാരിന്റെ ഗുണ്ടായിസമാണ് നടക്കുന്നത്. ഗുണ്ടകള്‍ വിലസുമ്പോൾ പൊലീസ് മഞ്ഞക്കുറ്റിക്ക് കാവിരിക്കുകയാണ്. പദ്ധതിക്കുള്ള വിഭവങ്ങള്‍ എവിടെനിന്ന് കൊണ്ടുവരുമെന്ന് അറിയില്ല. പദ്ധതിയിലാകെ ദുരൂഹതയാണെന്നും വിഷ്ണുനാഥ് പറഞ്ഞു.

മുംബൈ-അഹമ്മദാബാദ് അതിവേഗ റെയില്‍ പാത പദ്ധതിക്കെതിരെ സമരം ചെയ്യുന്ന സി.പി.എം ഇവിടെ പദ്ധതിയെ അനുകൂലിക്കുന്നത് ഇരട്ടത്താപ്പാണെന്ന് പി.സി.വിഷ്ണുനാഥ് ചൂണ്ടികാണിച്ചു.