പത്മഭൂഷൺ പുരസ്കാരം മലയാളത്തിന്റെ പ്രിയ നടൻ മമ്മൂട്ടി ഏറ്റുവാങ്ങി.

റിപ്പബ്ലിക് ദിനത്തിന്റെ ഭാഗമായി പ്രഖ്യാപിച്ച പത്മഭൂഷൺ പുരസ്കാരം മലയാളത്തിന്റെ പ്രിയ നടൻ മമ്മൂട്ടി ഏറ്റുവാങ്ങി. രാഷ്ട്രപതി ഭവനിൽ നടന്ന ചടങ്ങിൽ രാഷ്ട്രപതി ദ്രൗപതി മുർമു പുരസ്കാരം സമ്മാനിച്ചു. ജസ്റ്റിസ് കെ.ടി. തോമസ്, പി. നാരായണൻ എന്നിവർ രാജ്യത്തെ രണ്ടാമത്തെ ഉയർന്ന സിവിലിയൻ ബഹുമതിയായ പത്മ വിഭൂഷണും എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ പത്മ ഭൂഷണും പ്രമുഖ നർത്തകി വിമല മോഹൻ പത്മശ്രീ പുരസ്കാരവും ഏറ്റുവാങ്ങി. 

പ്രധാനമന്ത്രി നരേന്ദ്ര മോദിയെയും ലോക്‌സഭ സ്പീക്കർ ഓം ബിർളയെയും ആഭ്യന്തരമന്ത്രി അമിത് ഷായെയും കൈകൂപ്പി അഭിവാദ്യം ചെയ്ത ശേഷമാണ് മമ്മൂട്ടി പുരസ്കാരം സ്വീകരിക്കാനായി രാഷ്ട്രപതിയുടെ അടുത്തെത്തിയത്. പുരസ്കാരം ഏറ്റുവാങ്ങുന്നതിന് സാക്ഷികളായി കുടുംബാംഗങ്ങളുമുണ്ടായിരുന്നു.