പഴയ ചിത്രങ്ങള് റീമാസ്റ്റര് ചെയ്ത് പുതിയ കാലത്തിന് ചേര്ന്ന ദൃശ്യ, ശ്രാവ്യ അനുഭവത്തോടെയാണ് പുറത്തിറങ്ങുന്നത്. ഇക്കൂട്ടത്തിൽ മോഹൻലാൽ, മമ്മൂട്ടി സിനിമകൾക്കാണ് ഏറ്റവും കൂടുതൽ കയ്യടികൾ നേടിയിട്ടുള്ളത്. ഇപ്പോഴിതാ, 44 വർഷങ്ങൾക്ക് ശേഷം മലയാളത്തിലെ പഴയൊരു സിനിമ റീ റിലീസിന് ഒരുങ്ങുകയാണെന്ന റിപ്പോർട്ടാണ് പുറത്ത് വരുന്നത്.
മലയാളികളുടെ എക്കാലത്തെയും ആക്ഷൻ സ്റ്റാറായ ജയൻ നായകനായ ‘മീൻ’ എന്ന ചിത്രമാണ് റീ റിലീസിനൊരുങ്ങുന്നത്. ടി ദാമോദരൻ തിരക്കഥയെഴുതി ഐ വി ശശി സംവിധാനം ചെയ്ത ചിത്രം 1980-ലാണ് പുറത്തിറങ്ങിയത്. 2k ദൃശ്യമികവോടെ 5.1 ഡോൾബി അറ്റ്മോസ് ശബ്ദമികവോടെയാണ് മീൻ പ്രേക്ഷകരിലേക്കെത്തുന്നത്. ചിത്രം 2025 ഫെബ്രുവരിയിലാണ് റീ റിലീസ് ചെയ്യുന്നത്.
ജയനെ കൂടാതെ, മധു, സീമ, ശ്രീവിദ്യ, അടൂർ ഭാസി, ജോസ്, ശങ്കരാടി, അംബിക, ബാലൻ കെ നായർ തുടങ്ങിയ വമ്പൻ താരനിരയാണ് ചിത്രത്തിലുള്ളത്. ചെന്നൈയിലും മുംബൈയിലുമായി ചിത്രത്തിന്റെ റീമാസ്റ്ററിങ് നടന്നു കൊണ്ടിരിക്കുകയാണ്. ജി ദേവരാജന് സംഗീതം നല്കിയ മീനിലെ ഗാനങ്ങള് ഇന്നും മലയാളികൾക്ക് പ്രിയപ്പെട്ടതാണ്. റോഷിക എന്റർപ്രൈസസാണ് ചിത്രം റീ റിലീസ് ചെയ്യുന്നത്.
Post a Comment